NOHO IZY (Ravanondrazana)

NOHO IZY

Matoa aho mijoro sy velona eto ihany !
Matoa koa misoko ny embon-tsy lany
Dia noho i dada any lavitra any...
Matoa aho mikalo dia fetiny androany.

Matoa aho salama... I dada mpitsabo !
Manasitrana foana raha misy mahazo;
Manefy anay zanany hiafy sy hitolona.
Matoa aho tafita dia i dada no sorona.

Matoa aho tahaka ny zanaky ny olona !
Matoa aho nomena safidy ny hianatra
Handany ny harena 'zay efa nanasatra
Dia noho i dada tsy mahatsapa valaka
Na inona hamafin'ny zava-midona...
Iaretany eo foana na mafy io na mora !
I Dada manampy an'i neny mitaiza
No sady miremby hatraiza sy hatraiza.

I Dada noho izany ilay tsy hita matetika.

Fa teo ny anatranatra izay nabosesika;
Noho ny fihezahany mandona ny loha;
Noho ny atsembohany manindrona fo.
Ireo no miraikitra am-po lalan-dava
Matoa aho mikiry, te hioatra an'i dada !


RAVANONDRAZANA
31 MEY 2022 8:04 AM
--------