You are here: home > Vetso

OROKA VOALOHANY - Ravanondrazana

Azo vakiana?

OROKA VOALOHANY

Maniditsidina tsy aiko hoe nahoana?
Toa mitsingevana hatrany ny tenako.
Izay mba tsapaina, dia rivotra foana.
Mahagonina saina, ny feo mba reako.

Mampangorintsina mafy ny hatsiaka.
Miakatra tampoka koa ny hafanàna.
Manara-pigadon'ny onja masiaka;
Manala hetaheta ny tsy ampy filàna.

Manaitra mamoha ny mbola matory,
No sady mamboly ilay voa ato anaty.
Mahatonga fitsiry haharitra hamony;
Mampisy fitiavana mandra-pahafaty.

Hoatra ny miaina tontolo hafahafa...
Manadina ihany: 'ndrao efa fanahy?
Sa mbola mikimpy mamafa ny lasa,
Sa misy eritreritra mety hampanahy?

Fa mamiko loatra ny tsapako izany:
Foana tanteraka izay ao an-dohako.
Ny azo lazaina: tsy ambonin'ny tany;
Moa ve ankoatra ny làlan-kizorako?

Fa tampoka teo dia nisokatra mora,
Ny maso ka indro ilay silam-panahy.
Vehivavy voalohany, niraisako rora...
Nanaiky am-pitiavana hanoroka ahy.

RAVANONDRAZANA
12 AVRILY 2021

Mombamomba

Mpanoratra : Ravanondrazana

Nampiditra : Ravanondrazana
Daty : 13/04/2021
Mpamangy : 229
Mankafy : 0

Tononkalo hafa

NAHOANA
DIA
SAMBARA
MISAOTRA
ZANAKA MPANOTA
MAINTY
TSINGERIN-TAONA
POETA
DINGAM-PISARAHANA
MAHAGAGA