ROA SEGONDRA (Ravanondrazana)

ROA SEGONDRA


Roa segondra monja,
No sendra nifanojo,
Ny masontsika roa.
Ny anao malefak'onja,
No sady lasa tsongo
Manindrona ao am-po.

Roa segondra ihany,
No niainako tontolo
Hafa tany ankoatra.
Dia taitra noho izany
Ilay foko bobongolo
Izay resin-tory loatra.

Roa segondra koa,
No efa injay voavoly
Sahady tao am-poko,
Ilay raozy tokam-po,
Ho hanitra hampitony
Ao am-pasako toloko.

Roa segondra angamba
No efa ampy ho fehin'
Ny tena tiako ambara.
Ny hozona no hiapanga,
Sady ataoko ho rean'
Ny mpizara ny anjara,

Sy izao tontolo izao,
Fa "tena tiako ianao"!


RAVANONDRAZANA,
5 AVRIL 2020, 16H:15 min
--------