Iny habakabaka iny (andriary)

Ny habakabaka iny tsy foiko, mambabo ahy fatratra,
Satriko banjinina,fa vinakiko eo ny hafatra
Mampianatra ahy hitia , sy hankafy lay tiako
Itarafako ny aminy , sy ny anton'ny fisiako!

Iny habakabaka iny misy loko mitahiry
Sary efa voatokana, tsy misy mpahita firy
Ny endrik'ilay tiako, hitako eny , eny foana
Tsy voadoron'ny masoandro, tsy voafafan'ny fotoana!

Iny habakabaka iny misy eritreritra miampita
Tafatafan'olon-droa , fijery tsy mifankahita
Any anaty lalina any misy embona tsy rava
Io habakabak'io, io no toky lalandava!

Iny habakabaka iny , raha mbola misy azy iny
Dia mbola any lay tiako , mbola miandry lay tiany
Ny baliakany marevaka, no mitahiry ny hasambarany!
Na lavitr'aza ny olon-tiany;dia toy ny eo am-parafarany

Iny habakabak'iny, raha sendra semban-drahona,
Toa misy alahelo , tafatoetra te- hisaona
Dia maizina tsy hita , ny hitsilo zany lalako
Fa aiza ho aiza eto an- tany, no misy lay malalako

andriary
--------