NY FANAHY NO MAHAOLONA… (RRAG)
Mbola tsisy niantsa
(Nalaina tao amin'ny vetso.serasera.org)
NY FANAHY NO MAHAOLONA…Ny fo tsy te hangina, fa te hitroatra hiady,
mba ho fanafahana, ny zoga entin-tena.
Voafonja ny fanahy, voafatopato-tady,
fa toa manjaka irery, ny fitiavan-tena.
Mitroatra ny fanahy, mitady fahafahana,
toa ny ahiahy, no ‘ndray misakan-dalana.
Dia ny tena ihany, no mihazona ny laka,
ny izaho no hany re, re manjakazaka!
Ny fanahy no mahaolona, fa saingy resin-tena,
milavo anaty ady, miondri-paharesena.
Ny fanahy no mahaolona, kanefa toa voafetra,
ny fahefana an-tanany, terena hanam-petra.
Mitaky fahafahana, mitaky fahaleovan-tena,
ny fanahy ‘lay mahaolona, voafatotry ny izaho.
Ny izaho miziriziry, fa tompom-pandresena,
resy ny fanahy, raha nanoloana anao.
RRAG
21 Martsa 2013
--------
Rohy:
