Ho anao (Tsiky Mitia)

Ho anao (17/06/2016)

Iniako atao mihitsy ny mandray ny tànanao
rehefa isika mifanena, asa raha tsikaritrao!
fa toa mahavelom-bolo, manome fanantenana
eny! ny ririnina aza, dia zary misy hafanana

fihininao ny tanako ka mirana ny saiko
ny hany azoko lazaina, babonao aho re ry aiko
ilay isika hisaraka iny, dia orohonao kely
tena satriko hitohy, tsy hiala velively

finaritra ny sofiko mandre ny bitsibitsikao
hoe "tsy lainga izay lazaiko fa tena tiako ho ahy ianao"
isaky ny mifanena dia miontana iray ny foko
fa ny endrika ivelany mody ataoko miova loko

ny anilanao na dia tsy maharitra aza
dia efa ankafiziko izay kely mba sahaza
ilay fotoana fohy ifandraisantsika kely
dia tsy afaka ato an-tsaiko, tsy ho adino velively

Tsiky Mitia
--------