Ho an'i Hjravs (Z'ANDRYGASY)

Hotanteraka ny nofin'ilay tsy ampy sakafo
Raha tsy misy intsony zavatra lafo
Samy mbola nofy avokoa aloha hatram'izao
Ry HJRAVS, na ny holazaiko na ny voalazanao

Izao no mba zavatra fantatro
Tononkalo, hanoratako ny zavatra hitako
Tsy filaminana, korontana, halatra tsy hita lany
Raharaham-pirenena mivadika ambony ambany:

Nitoroka ny ao amin'ny antemieram-pirenena
Fa ireo zony hono tsy nohajaina fa nohosehosena
Mandeha ihany hono ilay daty
Fa mbola tsy azo foana ilay katikaty
Dia nandefa fitoriana teny amin'ny fitsarana
Fa ny filoham-pirenena hono nandika lalàna
Ireo solombavambahoaka sasany
Tsy nety:fa namela azy hanohy ny asany
Fa tsy rariny ny nolazain'iretsy teo aloha
I Madagasikara aza izao vao hifoha
Ka hosakanana sahady?
Tsy ekenay azafady
Efa manangasanga any zao ny dolara
Ka hiakatra ny PNBn'i MADAGASIKARA(1)
Ny FMI koa hanolotra fanampiana
Hoy ny vaovao mahaliana
Matoky aza izao ny mpampindram-bola
Raha niteny tao amin'ny télé ny minisitry ny vola
Hahatratra IRAY izao ny IDH(2)
Hofoana ihany koa ny VIH(3)

Hotanteraka ny nofin'ilay tsy ampy sakafo
Raha tsy misy intsony zavatra lafo
Samy mbola nofy avokoa aloha hatram'izao
Ry HJRAVS, na ny voalazako na ny voalazanao

Z'ANDRYGASY, 17 / 06 / 15

(1) harikarena faobe
(2) Indicateur de Développement Humain:fandrefesan'ny PNUD ny fari-piainana amin'ny lafiny ara-tsosialy, refesina:0 Hatramin'ny 1
(3) ny SIDA
--------