Ho an’i neny (Raims randriamalala (mahavonjy aimé))

Ry neny!
Tsaroako ianao fahiny
Raha nanatra ahy, nanatra niteny
Ary tsy mitrahatra mibedy mandrak'ankehitriny

Tsapako fa toa harena sarobidy
Izato bedinao,
Ka noraisiko ho adidy
Irony anatrao!

Ka ho setrin'izany rehetra izany
Dia ho adinoiko ireo taloha
Ka raha bedy aho dia tsy handrotsaka tomany,
ary tsy ataoko andolom-po fa teny mahasoa!

Koa ankehitriny anefa!
Mba manoratra aho ho anao
Ka ireo adidy tsy voaefa,
No ataoko an-tsoratra eto izao!

indro fetinao anio ry mamako
Dia indro misy tononkalo
izay voarangotry ity tanako
Ho solom-panomezana arahiko kalokalo

Tsaroako ianao,
Ilay niaina tanaty fahantrana!
Fa i dada izay lasana nandao
Efa taona maro izay, ny ainy moa tsy tana !

Ka dia ianao, ianao irery
Ilay nizaka fahoriana
Sy hany mba mijery
Ireto fahakambotiana

Tsy kivy anefa ianao
Fa niezaka hatrany hatrany
F’irony mpanenjika anao
Toa zary resy ka lavonao ambany

K’ireto zanaka aman-jafinao
No hany sisa mba fananana
Aza matahotra, fa ilay hoavinao
Dia efa horaisinay an-tanana

NOSORATAN'I RAIMS RANDRIAMALALA (Mahavonjy Aimé)
--------