You are here: home > Vetso

TETO - Ravanondrazana

TETO


Ambatobaraingo !

Teto no latsaka izany tavoniko,
Teto no niana-namindra ny tongotro.
Teto no niana-niteny ny vava,
Teto no tsiaron'ilay fahazaza.

Ambatobaraingo !

Teto no fanabeazana ho ahy;
Teto no fototry ny ara-panahy.
Teto no nianatra ny hadalana
Teto no niainako ny fahotana.

(Teto no niana-panaon'ny tontolo,
Teto ny ditra: nataoko daholo...)

Ambatobaraingo !

Teto no nisy ny tobin'ny harena,
Teto no nisy nangataka omena.
Teto no fiaina-nanefy ny toetra,
Teto no rivo-namoha ho "poeta".

Ambatobaraingo !

Teto no fototra nisy ny namako,
Teto no taitra izany fitiavako.
Teto no nisy an'ilay olo-tiako,
Teto no ivon'ny fianakaviako.

Ambatobaraingo !

Teto ny fiainako hipoka sedra;
Teto ny ho aviko nisy nangeja.
Teto no saika ho faty marary;
Teto ny tena: nisanta-mosary.

Ambatobaraingo !

Teto ny lasako sisa nilevona...
Teto no diariko tena matevona.
Teto izy ireny mifasana ho iray,
Teto ny maty dia velona indray
rehefa fohazin'ny saina mahay.

(Fa tanindrazako mandrakizay!)


RAVANONDRAZANA
03 febroary 2021