ISAKY NY MISY (Raims randriamalala (mahavonjy aimé))

ISAKY NY MISY


isaky ny misy
tsiaro kely monja
mitsimoka ato an-tsaiko
dia ny endrikao mitsiky
ny bikanao mafonja
no tena tantaraiko
inay aho ka manoratra

isaky ny reko
ireo kalon'ny fahiny,
izay niarahantsika nihira
toa mamelombelon-tsento
sy tonga alahelo mankadiry
ny akon-kiran'ny antsiva
ka zary mampatahotra

isaky ny misy
kalo tsara rindra
narafitro ho an-dalana
matetika toa tsy vitsy
ny rima mifandrindra
voasingotry ny tanana
hanehoana ny ato am-po

isaky ny manina ny tiako aho
dia manjombon-tankariva
iny am-paran-danitra iny
miantso, miangavy mitalaho
amin'ny feo somary iva
ity foko ankehitriny
ka mila tsy ho to!

Nosoratan'i Raims Randriamalala (Mahavonjy Aimé)
tanjombato 28-08-2019
--------